حكاية "هى" ..!!

"هى" كلمه من حرفين رغم انها صغيره فى الشكل بس معناها كبير اوى و حكايتها كتير .. 

فى بدايه الكلام هو يعنى ايه "هى" .. "هى" ممكن تكون الضمير ( اسمٌ يدل على متكلِّم أو مخاطَب أو غائب) فممكن تقول "هى" حبيبتى او "هى" مراتى ..

المهم "هى" ديه لها دلالات كثيرة وإيحاءات أكثر .. 

فلو حد قالك "هى" نقصاك فتعرف على طول انه مش طايق يسمعك وبيبقى شكلك وحش اوى ساعتها .. او مثلا "هى" فوضى وبيبقى ساعتها عملت مصيبه او بتفكر تعملها وبتبقى عادةً متجسد فى شخصيه شيطان .. فخلى بالك و افتكر كويس انك لو بقيت ملاك فى الدنيا فمفيش غير "هى" الجنه اللى هتدخلها .. ولو عيشت فى دور الشيطان فمفيش غير "هى" النار اللى هتستحقها ..

وخليك فاكر ان اللى جابتك للدنيا كانت "هى" .. و اللى ربتك كانت "هى" .. و"هى" اللى الجنه تحت رجليها ..

وممكن "هى" تكون اختك اللى مطلع عنيها فى البيت و اللى بتحب تشرب شاى من اديها "هى" بعد الغدا ..

و اكيد انت عارف ان "هى" اللى بتفضل ترغى معاها على التليفون بساعات ..

واكيد فاكر انت مين اللى بيخاف عليك و بيفضل يطمن عليك كل 10 دقائق غيرها "هى" ..

ده حتى صندوق اسرارك مبتديش مفتاحه غير ليها "هى" و بمزاجك ..

ومش هتلاقى حد يستحمل قرفك غيرها "هى" ..

و"هى" اللى لو جرحتك ممكن تجيبك الارض .. ماهو كيدهن عظيم بقى  :)

على العموم حكايات "هى" كتير اوى و مبتخلص .. 

حكاية منهم هتفرحك و حكاية هتزعلك و حكاية هتحب تفتكرها و حكاية هتلعن اليوم اللى حصلت فيه .. خلى بالك من "هى" لانها مش نص الدنيا "هى" كل الدنيا ولو مأحسنتش اختيار "هى" هتتعب اوى فى حياتك ..

حد فاهم حاجه ..صدعتكم صح

يلا صباحكم بيضحك

^__^

محمد عبدالرحمن